ఇటు ‘శివ’, అటు కాంత, మధ్యలో జిగ్రీస్..
ఈ వారం సందడి చేసే సినిమాలివే!
జీన్యూస్ ప్రత్యేక ప్రతినిది
నవంబర్ రెండో వారంలో ‘శివ’ రీ-రిలీజ్ తో పాటు ‘కాంత’, ‘జిగ్రీస్’, ‘సంతాన ప్రాప్తిరస్తు’ వంటి పలు సినిమాలు ప్రేక్షకుల ముందుకు వస్తున్నాయి. ఓటీటీలో కూడా ‘డ్యూడ్’, ‘దిల్లీ క్రైమ్‌ 3’ వంటివి సందడి చేయనున్నాయి. ఈ వారం థియేటర్లు, ఓటీటీలలో వినోదానికి కొదవలేదు.
నవంబర్ 1న ప్రపంచ వ్యాప్తంగా విడుదలైన ‘మాస్ జాతర’ మూవీ శుభారంభాన్ని ఇవ్వలేకపోయింది. మొదటి వారంలో వచ్చిన రష్మిక మందన్న ‘ది గర్ల్ ఫ్రెండ్’, తిరువీర్ ‘ది గ్రేట్ ప్రీ వెడ్డింగ్ షో’ చిత్రాలు పాజిటివ్ టాక్ తెచ్చుకున్నాయి. మౌత్ టాక్ తో మంచి వసూళ్లు రాబడుతున్నాయి. అయితే సుధీర్ బాబు ‘జటాధర’ చిత్రం నిరాశ పరిచింది. విష్ణు విశాల్‌ ‘ఆర్యన్‌’తో పాటుగా ‘ప్రేమిస్తున్నా’ లాంటి మరికొన్ని సినిమాలు కూడా ప్రభావం చూపించలేకపోయాయి. ఇప్పుడు రెండో వారంలో అనేక చిన్న సినిమాలు అదృష్టాన్ని పరీక్షించుకోడానికి వస్తున్నాయి. వీటితో పాటుగా ‘శివ’ మూవీ రీరిలీజ్ అవుతోంది.
కింగ్ అక్కినేని నాగార్జున, సెన్సేషనల్ డైరెక్టర్ రామ్ గోపాల్ వర్మ కాంబోలో వచ్చిన కల్ట్ క్లాసిక్ మూవీ ‘శివ’. 1989లో ఎన్నో సంచలనాలు సృష్టించిన ఈ చిత్రం.. 36 ఏళ్ల తర్వాత మరోసారి ప్రేక్షకులకు సరికొత్త అనుభూతిని పంచడానికి వస్తోంది. అన్నపూర్ణ స్టూడియోస్‌ నిర్మించిన ఈ మూవీ నవంబర్ 14న గ్రాండ్ గా రీ రిలీజ్ అవుతోంది. నేటి యువతరానికి కూడా ‘శివ’ను దగ్గర చేయడానికి 4K డాల్బీ అట్మాస్‌ వెర్షన్‌లో విడుదల చేస్తున్నారు. కొత్త సినిమాల తరహాలోనే ప్రమోషన్స్ చేస్తున్నారు. చిరంజీవి, మహేష్ బాబు, ప్రభాస్, అల్లు అర్జున్, ఎస్.ఎస్ రాజమౌళి, సందీప్ రెడ్డి వంగా వంటి సినీ ప్రముఖులు కూడా ఈ ప్రచారంలో భాగమయ్యారు. అడ్వాన్స్ బుకింగ్స్ కూడా చాలా బాగున్నాయి.
టాలీవుడ్ లో మంచి మార్కెట్ క్రియేట్ చేసుకున్న దుల్కర్‌ సల్మాన్‌.. ఇప్పుడు ‘కాంత’ సినిమాతో ప్రేక్షకులను అలరించడానికి వస్తున్నారు. సెల్వమణి సెల్వరాజ్‌ దర్శకత్వం వహించిన ఈ సినిమాలో భాగ్యశ్రీ బోర్సే హీరోయిన్ గా నటించింది. సముద్రఖని, రానా కీలక పాత్రలు పోషించారు. రానా దగ్గుబాటి, దుల్కర్‌ సంయుక్తంగా ఈ చిత్రాన్ని నిర్మించారు. 1950స్ లో సాగే కథాంశంతో ఈ చిత్రం రూపొందింది. నవంబర్ 14న ఈ సినిమా తెలుగు, తమిళం, మలయాళ భాషల్లో విడుదల కానుంది.
కృష్ణ బురుగుల, ధీరజ్‌ ఆత్రేయ, మణి వక్కా, రామ్ నితిన్‌ ప్రధాన పాత్రల్లో నటించిన సినిమా ‘జిగ్రీస్’. హరీష్ రెడ్డి ఉప్పుల దర్శకత్వం వహించిన ఈ చిత్రాన్ని కృష్ణ వోడపల్లి నిర్మించారు. సందీప్ రెడ్డి వంగా ఫస్ట్ లుక్ లాంచ్ చేయడంతో అందరి దృష్టి ఈ సినిమాపై పడింది. దానికి తగ్గట్టుగానే టీజర్, ట్రైలర్ ఆకట్టుకున్నాయి. ‘ఈ నగరానికి ఏమైంది’, ‘జాతిరత్నాలు’ తరహాలో ఫన్ రైడ్ గా ఉండబోతోందని తెలుస్తోంది. నవ్వులతో పాటుగా హృదయాల్ని కదిలించే భావోద్వేగాలు కూడా ఉంటాయని చిత్ర బృందం చెబుతోంది. ఈ నెల 14న ఈ చిత్రం ప్రేక్షకుల ముందుకు వస్తోంది.
సంజీవ్‌ రెడ్డి దర్శకత్వంలో విక్రాంత్‌, చాందిని చౌదరి హీరో హీరోయిన్లుగా నటించిన సినిమా ‘సంతాన ప్రాప్తిరస్తు’. ఇందులో తరుణ్‌ భాస్కర్‌, వెన్నెల కిశోర్‌, అభినవ్‌ గోమటం తదితరులు కీలక పాత్రలు పోషించారు. నేటితరం ఎదుర్కొంటున్న సంతాన లేమి సమస్య ఇతివృత్తంగా తెరకెక్కిన ఈ సినిమా నవంబర్ 14న రిలీజ్ కానుంది. దీంతో పాటుగా ‘Cమంతం’ అనే మరో చిన్న సినిమా కూడా ఈ వారం థియేటర్లలోకి రానుంది.
