హుజూరాబాద్, జీ న్యూస్ : నక్సలైట్ అగ్రనేతలు గోపగాని ఐలన్న, గోపగాని కుమారస్వామిల అమ్మ గోపగాని కొమరమ్మ (92) (Komuramma) గురువారం మృతి చెందారు. ఆమె మరణంతో హుజూరాబాద్ మండలం తుమ్మనపల్లి గ్రామంలో విషాద ఛాయలు అలుముకున్నాయి. గోపగాని కొమరమ్మకు ఐదుగురు కుమారులు, ఒక కుమార్తె. వారిలో ఇద్దరు కుమారులు గోపగాని కుమారస్వామి అలియాస్ రవన్నలు నాటి పీపుల్స్ వార్ పార్టీలో క్రియాశీలకంగా పనిచేశారు. 1979లో కమలాపూర్ మండలం, గూడూరులో ఏర్పడిన తొలి దళంలో సభ్యునిగా చేరారు. దళంలో పనిచేస్తున్న సమయంలోనే గ్రెనేడ్ ప్రమాదంలో ఆయన మరణించారు.
మరో కుమారుడు గోపగాని ఐలన్న పీపుల్స్ వార్ పార్టీకి ఉత్తర తెలంగాణ రీజనల్ కార్యదర్శిగా పని చేసిన ఆయన 1988లో హైదరాబాద్ నగరంలో ఆయన అదృశ్యమయ్యారు. ఇది పీపుల్స్ వార్ వర్గాల ప్రకారం కిడ్నాప్ ఘటన. అప్పటి నుంచి ఇప్పటివరకు ఆయన ఆచూకీ తెలియలేదు. ఈ ఘటనకు నిరసనగా అప్పటి పీపుల్స్ వార్ మావోయిస్టు పార్టీ పలు చర్యలకు దిగింది. మంథని ఎంపీపీ కిషన్ నాయక్, కమాన్‌పూర్ ఎంపీపీ రామచంద్ర గౌడ్‌లను కిడ్నాప్ చేసి తర్వాత విడుదల చేశారు. ఆ తర్వాత తాడిచెర్ల ఎంపీపీ మలహల్ రావును కిడ్నాప్ చేసి, ప్రభుత్వం స్పందించకపోవడంతో నక్సలైట్లు కాల్చి చంపారు. ఒక ఎంపీపీని నక్సలైట్లు హతమార్చడం ఇదే తొలిసారి కావడంతో ఈ ఘటన తీవ్ర చర్చకు దారితీసింది.
అనంతరం ప్రభుత్వం ఐలన్న కిడ్నాప్‌పై ఒక కమిషన్ ఏర్పాటు చేసినప్పటికీ, ఆ కమిషన్ రిపోర్ట్‌ను తొక్కిపెట్టారన్న ఆరోపణలు ఉన్నాయి. ఐలన్న కిడ్నాప్‌కు అప్పటి డీఐజీ వ్యాసే కారణమని పీపుల్స్ వార్ పార్టీ భావించి, ఆయనను హైదరాబాద్‌లో కాల్చి చంపినట్లు అప్పట్లో ప్రకటించింది. ఇన్ని సంఘటనలకు మూల కారణం గోపగాని ఐలన్న కిడ్నాప్ కావడమే. తన కొడుకు ఐలన్న కోసం దాదాపు నాలుగు దశాబ్దాలుగా కళ్లల్లో వత్తులు వేసుకుని చూసిన కొమరమ్మ, అతని ఆచూకీ తెలియకుండానే మరణించడం విషాదకరం. ఐలన్న సోదరుడు గోపగాని లింగన్న ప్రస్తుతం సామాజిక ఉద్యమాలలో చురుకుగా పాల్గొంటున్నారు. కొమురమ్మ మృతి పట్ల పలువురు ప్రముఖులు, ప్రజలు నివాళులర్పించారు. ఆమె ధైర్యం, త్యాగం చిరస్మరణీయం అని వారు కొనియాడారు.
