విజయ్ దేవరకొండ – గౌతమ్ తిన్ననూరి కాంబినేషన్‌లో వస్తున్న చిత్రం ‘కింగ్‌డమ్’ జూలై 31న ప్రేక్షకుల ముందుకు రానుంది. హీరోయిన్‌గా భాగ్యశ్రీ బోర్సే నటిస్తుండగా, సంగీతం అనిరుధ్ రవిచందర్ అందిస్తున్నారు. ఈ సందర్భంగా, చిత్ర బృందం హైదరాబాద్‌ యూసుఫ్‌గూడ పోలీస్‌ గ్రౌండ్స్‌లో ప్రీ-రిలీజ్ ఈవెంట్‌ను ఘనంగా నిర్వహించింది.
ఈ ఈవెంట్‌లో విజయ్ దేవరకొండ భావోద్వేగానికి లోనయ్యారు.
“మీరు నాకు దేవుడిచ్చిన వరం. సినిమాలు ఎలా ఉన్నా, మీరు నాపై చూపుతున్న ప్రేమ మాత్రం ఎప్పుడూ మారదు,” అంటూ అభిమానులను ఉద్దేశించి ఎమోషనల్‌గా మాట్లాడారు.
అలాగే “జూలై 31న థియేటర్లలో కలుద్దాం. మేమంతా మంచి సినిమా తీసాం అన్న సంతృప్తి ఉంది. ఇది నా సినిమా కాదు.. ఇది గౌతమ్ తిన్ననూరి, అనిరుధ్, నాగవంశీ, సత్యదేవ్, వెంకటేశ్ – అందరి కలసి చేసిన సినిమా. అందరూ తమవంతుగా హృదయపూర్వకంగా పనిచేశారు” అని తెలిపారు.
భాగ్యశ్రీ బోర్సే నటన, కృషిని విజయ్ ప్రశంసించారు. సత్యదేవ్ పాత్రకు బాగా న్యాయం చేశారని, షూటింగ్ సమయంలో నిజంగానే తమ్ముడిలా అనిపించాడని చెప్పారు. వెంకటేశ్ కూడా ఆకట్టుకునే నటన చూపించారని అన్నారు. ‘కింగ్‌డమ్’ చిత్రం ప్రేక్షకుల మనసు గెలుస్తుందనే నమ్మకం వ్యక్తం చేశారు.
