Operation Sindoor | ప్రముఖ రియాలిటీ షో ‘కౌన్ బనేగా కరోడ్‌పతి (KBC)’లో భారత సైనికాధికారులు పాల్గొనడం తాజాగా పెద్ద దుమారానికి కారణమైంది. పహల్గామ్ ఉగ్రదాడి అనంతరం భారత్ చేపట్టిన ‘ఆపరేషన్ సిందూర్’కు సంబంధించిన కీలక సమాచారం ఈ షోలో వెల్లడించడంపై నెటిజన్లు తీవ్ర ఆగ్రహాన్ని వ్యక్తం చేస్తున్నారు. స్వాతంత్ర్య దినోత్సవం సందర్భంగా ఆగస్టు 15న ప్రసారం కానున్న ఈ ప్రత్యేక ఎపిసోడ్‌కు సంబంధించిన టీజర్‌ను ఇటీవల విడుదల చేశారు. హోస్ట్ అమితాబ్ బచ్చన్ ఈ ఎపిసోడ్‌కు హాజరైన సైనికాధికారులకు ఘనంగా స్వాగతం పలికారు. ఇందులో కల్నల్ సోఫియా ఖురేషి మాట్లాడుతూ ‘పాకిస్థాన్ తరచూ ఉగ్రవాద చర్యలకు పాల్పడుతోంది. దీనికి గట్టి ప్రతిచర్యగా ఆపరేషన్ సిందూర్ చేపట్టాం’ అని వెల్లడించారు.
ఈ ఎపిసోడ్‌లో కల్నల్ ఖురేషితో పాటు, వింగ్ కమాండర్ వ్యోమికా సింగ్, భారత నౌకాదళంలో యుద్ధ నౌకకు కమాండర్‌గా సేవలందిస్తున్న తొలి మహిళా అధికారి ప్రేరణా దేవ్‌స్థలే పాల్గొన్నారు. అయితే, సాయుధ దళాల్లో కీలక పాత్ర పోషిస్తున్న అధికారుల్లాంటి వారు యూనిఫాంలో ఒక ఎంటర్‌టైన్‌మెంట్ కార్యక్రమంలో పాల్గొనడంపై సామాజిక మాధ్యమాల్లో తీవ్ర వ్యతిరేకత వ్యక్తమవుతోంది. ‘ఇలాంటి సున్నితమైన ఆపరేషన్ వివరాలు బహిర్గతం చేయడం బాధాకరం. అధికారులు విధుల్లో ఉండగానే, యూనిఫాంలో టీవీ షోలలో కనిపించడం ఎక్కడా చూడం. ప్రభుత్వ పీఆర్ కోసం సైన్యాన్ని వాడుకోవడం సిగ్గుచేటు’ అంటూ ఓ యూజర్ ట్వీట్ చేశాడు.
ఇంకొంతమంది నెటిజన్లు మాట్లాడుతూ ‘భారత సైన్యానికి గౌరవం ఉంది. దాన్ని రాజకీయ ప్రయోజనాల కోసం వాడుకోవడం తగదు. సైన్యం రాజకీయాలకు అతీతంగా ఉండాలి’ అన్నారు. ఇదిలా ఉండగా, ఆర్మీ నిబంధనల ప్రకారం, అధికారిక యూనిఫాంలో సాంస్కృతిక కార్యక్రమాలు, సామాజిక సమావేశాల్లో పాల్గొనకూడదు. అలాగే, రెస్టారెంట్లు, పౌర విమానాలు, పబ్లిక్ ప్రదేశాల్లో యూనిఫాంలో ఉండడం నిషిద్ధం. కమాండింగ్ అధికారి నుంచి ముందస్తు అనుమతి లేకుండా ఏ ఇతర కార్యక్రమంలో యూనిఫాంలో పాల్గొనడం నిబంధనలకు విరుద్ధంగా పరిగణిస్తారు.
ఇటీవలి కాలంలో కూడా ఇలాంటి దుమారం చోటుచేసుకుంది. మలయాళ సినీ నటుడు మోహన్‌లాల్, గౌరవ లెఫ్టినెంట్ కల్నల్ హోదాలో కేరళ ప్రభుత్వ ప్రకటనలలో యూనిఫాం ధరించి కనిపించడంతో ఆయనపై వ్యాపార ప్రయోజనాల కోసం ఆ హోదాను వాడుకుంటున్నారన్న విమర్శలు వచ్చాయి. అయితే, మోహన్‌లాల్ ఈ ఆరోపణలను తీవ్రంగా ఖండించారు.
Avatar | జేమ్స్ కామెరూన్ అవతార్ ట్రైలర్.. ఫైర్ అండ్ యాష్ థీమ్‌తో విజువల్ వండర్
