ఐఫోన్ 17′ కోసం ఎగబడ్డ జనం.
. అర్ధరాత్రి నుంచే స్టోర్ల ముందు క్యూ.
జీ న్యూస్ ప్రత్యేక ప్రతినిథి
దిగ్గజ టెక్ సంస్థ.. యాపిల్ ఇటీవల ఐఫోన్ 17 సిరీస్ మోడల్స్ ఆవిష్కరించిన సంగతి తెలిసిందే. ఇక వీటి ప్రీ బుకింగ్స్ సెప్టెంబర్ 12 నుంచే ప్రారంభం కాగా.. ఇప్పుడు స్టోర్లలోకి అందుబాటులోకి వచ్చాయి. దీంతో ఐఫోన్ కొనుగోలు చేసేందుకు.. రిటైల్ స్టోర్ల ముందు జనం పెద్ద ఎత్తున గుమికూడారు. పలు చోట్ల తోపులాటలు కూడా జరిగాయి. లైన్లలో పరస్పరం దాడులు చేసుకుంటున్న వీడియోలు నెట్టింట హల్‌చల్ చేస్తున్నాయి.
ఐఫోన్ 17 క్రేజీ ఇంతింత కాదు
మొబైల్ ప్రియులకు ఐఫోన్ అంటే ఎంత ఇష్టమో ప్రత్యేకంగా చెప్పాల్సిన పని లేదు. అన్నింట్లో ఇది స్పెషల్ అంతే. దీనికి ఉండే ఫీచర్లు.. ఇట్టే ఆకర్షిస్తాయి. క్రికెటర్లలో ధోనీ,,,కోహ్లీ .. సినిమా హీరోల్లో షారుక్, హృతిక్ ఎంత ఫేవరేటో.. ఫోన్లలో ఐఫోన్ అలా. ఇటీవలి కాలంలో ఈ యాపిల్ ఐఫోన్లకు డిమాండ్ ఇంకా పెరిగిపోతోంది. ఇండియాలో డిమాండ్‌ను దృష్టిలో పెట్టుకొని.. ఇటీవల ఇక్కడ యాపిల్.. పెద్ద ఎత్తున రిటైల్ స్టోర్స్ కూడా తెరుస్తోంది. ముంబై, ఢిల్లీల్లో స్టోర్స్ అందుబాటులోకి రాగా.. పుణె, బెంగళూరులో అతిత్వరలోనే అందుబాటులోకి రానున్నాయి. కొద్ది రోజుల కిందట యాపిల్ ఐఫోన్ 17 సిరీస్ ఫోన్స్ ఆవిష్కరించగా.. అవి నేటి , సెప్టెంబర్ 19 అందుబాటులోకి వచ్చాయి.
ప్రీ బుకింగ్స్ సెప్టెంబర్ 12 నుంచే ప్రారంభం అయినప్పటికీ.. స్టోర్లలో ఫోన్స్ కొనేందుకు జనం ఎగబడ్డారు. ముంబైలోని తన ఫ్లాగ్‌షిప్ స్టోర్స్ ముందు కస్టమర్లు పెద్ద ఎత్తున బారులు తీరారు. మొట్టమొదట తామే ఐఫోన్ 17 దక్కించుకోవాలని ఎంతో మంది ఆరాటపడ్డారు. ఐఫోన్ 17 దక్కించుకునేందుకు చాలా మంది ఆత్రుతగా ఎదురుచూస్తున్నారు. అయితే.. సరైన భద్రతా సిబ్బంది లేకపోవడంతో.. జనం క్రమశిక్షణ పాటించట్లేదని.. పలుమార్లు క్యూ లైన్స్ బ్రేక్ చేస్తున్నారని వాపోతున్నారు.
ఈ క్రమంలోనే ముంబై బీకేసీ జియో సెంటర్‌లోని యాపిల్ స్టోర్ వద్ద ఐఫోన్ కోసం జనం కొట్టుకోవడం విశేషం. క్యూలో నిల్చున్న వారు పరస్పరం కొట్టుకున్నారు. పిడిగుద్దులు కురిపించుకున్నారు. వీటికి సంబంధించిన వీడియోలు సోషల్ మీడియాల్లో వైరల్ అవుతున్నాయి. ఢిల్లీ సాకేత్ స్టోర్ ముందు కూడా జనం పెద్ద ఎత్తున క్యూలో నిల్చొని ఐఫోన్ దక్కించుకోవాలని చూస్తున్నారు. ఇప్పుడు పండగ సీజన్‌లో సేల్స్ విపరీతంగా పెరుగుతాయని.. యాపిల్ భావిస్తోంది.
ఐఫోన్17 ధరలు…ఫీచర్లు
సెప్టెంబర్ 9న యాపిల్ సంస్థ.. ఐఫోన్ 17 సిరీస్‌లో.. ఐఫోన్ 17, ఐఫోన్ 17 ఎయిర్, ఐఫోన్ 17 ప్రో, ఐఫోన్ 17 ప్రో మ్యాక్స్ సహా ఎయిర్‌పాడ్స్ 3, వాచ్ సిరీస్ 11, వాచ్ SE3, వాచ్ అల్ట్రా 3 ఇలా అన్నింటినీ ఆవిష్కరించింది. అప్పటి నుంచే వీటి ఫీచర్లు, ధరల గురించి విస్తృతంగా చర్చ నడుస్తోంది. ఈసారి యాపిల్.. తన బేస్ మోడల్స్‌ను 256 GB వేరియంట్లలో తీసుకురావడం విశేషం. భారత్‌లో ఐఫోన్ 17 ధర రూ. 82,900; ఐఫోన్ 17 ఎయిర్ ప్రైస్ రూ. 1,19,900 గా ఉంది. ఇక ఐఫోన్ 17 ప్రో ధర రూ. 1,34,900; ప్రో మ్యాక్స్ ధర గరిష్టంగా రూ. 1,49,900 గా ఉంది. దేశవ్యాప్తంగా ఆపిల్ స్టోర్లు, అమెజాన్, ఫ్లిప్‌కార్ట్ వంటి ఆన్‌లైన్ ప్లాట్‌ఫామ్‌లలో అమ్మకాలు జరుగుతున్నాయి.
