Sagar Project | నాగార్జున సాగర్ ప్రాజెక్టు ఎగువ నుంచి భారీగా వరద వచ్చి జలాశయం పూర్తిగా నిండిపోయింది. దీంతో అధికారులు గేట్లు ఎత్తేందుకు ఏర్పాట్లు చేస్తున్నారు. మంగళవారం ఉదయం 10 గంటలకు నీటిని విడుదల చేయనున్నారు. ఈ కార్యక్రమంలో మంత్రులు ఉత్తమ్‌కుమార్ రెడ్డి, కోమటిరెడ్డి వెంకట్‌రెడ్డి, అడ్లూరి లక్ష్మణ్ పాల్గొననున్నారు. రేడియల్‌ క్రస్ట్‌ గేట్లను వారు ఎత్తనున్నారు.
ప్రస్తుతం సాగర్‌కు 2,01,743 క్యూసెక్కుల వరద నీరు వచ్చేస్తోంది. దీనికి ప్రతిగా 41,497 క్యూసెక్కుల నీటిని విడుదల చేస్తున్నారు. ప్రాజెక్టు పూర్తి నీటిమట్టం 590 అడుగులు కాగా, ప్రస్తుతం నీటిమట్టం 586.80 అడుగుల వద్ద ఉంది. సాగర్ గరిష్ఠ నిల్వ సామర్థ్యం 312.045 టీఎంసీలు కాగా, ఇప్పటికి 304.468 టీఎంసీలు నీరు నిల్వగా ఉన్నాయి. ప్రాజెక్టు ప్రధాన జలవిద్యుత్ కేంద్రంలో విద్యుత్ ఉత్పత్తి కొనసాగుతోంది.
జూలై నెలలో సాగర్ పూర్తిగా నిండడం 18 ఏళ్ల తర్వాత ఇదే తొలిసారి కావడం విశేషం. మరోవైపు శ్రీశైలం ప్రాజెక్టుకు కూడా భారీ వరద వచ్చి చేరుతుండటంతో అక్కడి అధికారులు ఇప్పటికే ఐదు గేట్లు ఎత్తి దిగువకు నీటిని విడుదల చేస్తున్నారు.
