జీన్యూస్ కరీంనగర్ : కరీంనగర్ జిల్లా గ్రామీణ ప్రాంత పరిధిలో గత కొన్ని నెలలుగా రైతులు, పౌరుల ఆస్తులకు నష్టం కలిగించిన దొంగతనాల కేసులను జిల్లా పోలీసులు ఛేదించారు. ప్రధానంగా 12 కాపర్, కరెంట్ మోటార్ వైర్ దొంగతనాలు, 3 పశువులు, పందులు, గొర్రెలు-మేకల దొంగతనాల కేసుల (మొత్తం 15 కేసులు) మిస్టరీని ఛేదించి, ఆరుగురు నిందితులను అరెస్టు చేశారు. శనివారం చొప్పదండిలోని గుమ్లాపూర్ చౌరస్తా వద్ద పోలీసులు నిర్వహించిన వాహన తనిఖీలలో అనుమానాస్పదంగా వెళ్తున్న బోలెరో క్యాంపర్, అశోక లేల్యాండ్ వాహనాలను ఆపి తనిఖీ చేయగా పలు దొంగతనాలలో పాల్గొన్న నిందితులు పట్టుబడ్డారు.
దొంగల ముఠా సభ్యులు, స్క్రాప్ వ్యాపారి అరెస్టు
కరీనంగర్కు చెందిన మానుపాటి శేఖర్, చొప్పదండికి చెందిన మనుపాటి సంజీవ్, రామగిరికి చెందిన ఉండాటి మహేశ్, ఇల్లంతకుంటకు చెందిన బోదాసు కుమార్, కమాన్పూర్ మండలం పెంచికల్పేటకు చెందిన సాగర్ల రంజిత్ లతో పాటు చొప్పదండికి చెందిన స్క్రాప్ వ్యాపారి బొడిగె సంపత్ను ఆరెస్టు చేసినట్లు సీపి వెల్లడించారు. పట్టుబడిన నిందితులు గతంలో పలు పోలీస్ స్టేషన్ల పరిధిలో నమోదైన 15 చోరీల్లో వీరు పాల్గొన్నట్లు దర్యాప్తులో తేలిందిన్నారు. వీరినుండి సుమారు 20 లక్షల విలువగల ఒక బోలెరో వాహనం, ఒక అశోక లేల్యాండ్ వాహనం, ఒక మోటార్ సైకిల్, 3 క్వింటాళ్ల కాపర్ వైరు లను స్వాదీనం చేసుకున్నట్లు వెల్లడించారు. పట్టుబడిన నిందితులపై కేసు నమోదు చేసి చట్టపరమైన చర్యలు తీసుకుని రిమాండ్‌కు తరలించనున్నామని తెలిపారు. పరారీలో ఉన్న మిగిలిన 8 మంది నిందితుల కోసం గాలింపు చర్యలు కొనసాగుతున్నాయన్నారు. ఏసీపి జి. విజయ కుమార్ ఆద్వర్యంలో సిబ్బంది చాలెంజ్ గా తీసుకొని దొంగలను పట్టుకున్నారన్నారు. దొంగల ముఠాను అరెస్టు చేయటంలో సీఐలు ప్రదీప్ కుమార్, సంజీవ్ లు, ఎస్ఐలు నరేష్ రెడ్డి, వంశీ కృష్ణ లతో పాటు సిబ్బంది అనిల్, రాజ్ నాయక్, హేమసుందర్, శ్రీనివాస్, హసనోద్దీన్, రవీందర్, సృజన్ తదితరులు కృషి చేశారని వారిని సీపీ అభినందించారు.
