చెక్ బౌన్స్ కేసులో ముద్దాయికి రెండు సంవత్సరాల జైలు శిక్ష..
5 వేల జరిమానా..
హుజురాబాద్ జీ న్యూస్
హుజురాబాద్ ఫస్ట్ అడిషనల్ జ్యుడీషియల్ మేజిస్ట్రేట్ కోర్టు లో నమోదైన మూడు చెక్ బౌన్స్ కేసుల్లో ఒకే ముద్దాయికి రెండు సంవత్సరాల సాధారణ జైలు శిక్ష మరియు రూ. 5 వేల జరిమానా విధిస్తూ కీలక తీర్పు వెలువరించింది.
న్యాయవాది కేతిరి శ్రీనివాస్ రెడ్డి వెల్లడించిన వివరాల ప్రకారం…సైదాపూర్ మండలం దుద్దేనపల్లి గ్రామానికి చెందిన ముద్దాయి చాడ కొండాల్ రెడ్డి, హుజురాబాద్ మండలం పెద్ద పాపాయ్యపల్లెకు చెందిన ఫిర్యాదుదారులు పో రెడ్డి విజేందర్ రెడ్డి 8 లక్షల 20 వేలు, రావుల తిరుపతి రెడ్డి 5 లక్షలు మరియు రావుల సమ్మిరెడ్డి 8,లక్షలు అప్పుగా తీసుకున్న సొమ్ముకు సంబంధించి చెక్కులను జారీ చేశారు.
సదరు చెక్కులు బ్యాంకులో చెక్ బౌన్స్ అయ్యాయి. దీంతో బాధితులు న్యాయస్థానాన్ని ఆశ్రయించి 2018 సంవత్సరంలో మూడు ప్రత్యేక ఫిర్యాదులను దాఖలు చేశారు.
ఏడు సంవత్సరాల సుదీర్ఘ విచారణ అనంతరం ఫస్ట్ అడిషనల్ జ్యుడీషియల్ మేజిస్ట్రేట్ పద్మసాయి శ్రీ ఈ మూడు కేసుల్లో ముద్దాయి చాడ కొండాల్ రెడ్డి నేరాన్ని ధ్రువీకరించారు. ఒక్కొక్క కేసులో ముద్దాయికి రెండు సంవత్సరాల చొప్పున జైలు శిక్ష మరియు రూ. 5, వేల చొప్పున జరిమానా విధించడంతో పాటు, ఫిర్యాదుదారులు ఇచ్చిన డబ్బులకు రెట్టింపు ఇవ్వాలని, కోర్టు ఖర్చులను చెల్లించాలని ఆదేశించారు.
తీర్పు వెలువడిన వెంటనే, కోర్టు హాలులోని ముద్దాయి కొండాల్ రెడ్డిని పోలీసులు అదుపులోకి తీసుకుని జైలుకు తరలించారు. ఫిర్యాదుదారుల తరఫున న్యాయవాది కేతిరి శ్రీనివాస్ రెడ్డి వాదనలు వినిపించారు.
