ఘనంగా ఎంగిలి పూల బతుకమ్మ………. రాజాజీనగర్ కాలనీ లో సంబురాలు

ఘనంగా ఎంగిలి పూల బతుకమ్మ
రాజాజీనగర్ కాలనీ లో సంబురాలు

వరంగల్​ జీ న్యూస్​

తొమ్మిది రోజుల బతుకమ్మ సంబురాలు ఆదివారం ఘనంగా ప్రారంభం అయ్యాయి. తొలి రోజు ఆడబిడ్డలంతా తీరోక్కపూలతో ఎంగిలిపూల బతుకమ్మలను పేర్చి ఆడిపాడారు. బతుకమ్మ బతుకమ్మ ఉయ్యాలో.. బంగారు బతుకమ్మ ఉయ్యాలో.. అంటూ ఆదివారం సాయంత్రం ‘ఎంగిలి పూల బతుకమ్మ వేడుకలు’ ఘనంగా ప్రారంభం అయ్యాయి. తొలిరోజు వేడుకల్లో భాగంగా తంగేడు, గునుగు, బంతి, పట్నం బంతి, పట్టుకుచ్చు, తామర పువ్వు, గుమ్మడి పువ్వులతో బతుకమ్మలను అందంగా అలంకరించారు. వరంగల్​ పట్టణ కేంద్రంలోని పలు కాలనీల్లో మహిళలు ఒకచోట చేరి ‘ఒక్కేసి పువ్వేసి సందమామ ఒక్క జాములో సందమామ…, ‘చిత్తు చిత్తూల బొమ్మ శివుని ముద్దుల గుమ్మా.. అందాల బొమ్మ దొరికెనమ్మో ఈ వాడలోన’ అంటూ బతుకమ్మ పాటలతో హోరెత్తించారు.

రాజాజీనగర్ కాలనీ లో సంబురాలు

గ్రేటర్ వరంగల్ మున్సిపల్ కార్పొరేషన్ పరిధి లోని 52వ డివిజన్ రాజాజీనగర్ కాలనీ లో ఎంగిలి బతుకమ్మ ఉత్సవాలు ఘనంగా జరిగాయి. వయో భేదాన్ని మరిచి చిన్నా, పెద్దా తేడా లేకుండా మహిళలందరూ ఆనందోత్సహాల మధ్య బతుకమ్మలు చేతబట్టి కోలాటం, ఉయ్యాల, డీజే పాటలతో బతుకమ్మ తల్లిని కొలుస్తూ ఆడి, పాడారు. వేడుకలకు పుర ప్రముఖులు, ప్రజలు భారీ సంఖ్యలో తరలివచ్చి బతుకమ్మ వేడుకల్లో పాల్గొన్నారు. తొలిరోజు ఎంగిలి పూల బతుకమ్మ వేడుకలు ముగిసిన అనంతరం బతుకమ్మలను నిమజ్జనం చేశారు. అనంతరం మహిళలు వాయినాలను ఇచ్చి పుచ్చుకున్నారు.