చిత్తు చిత్తుల బొమ్మ ….
నాగార్జున డైరీ లో అంబరాన్నంటిన బతుకమ్మ సంబురాలు
కరీంనగర్ జీ న్యూస్
కరీంనగర్ జిల్లా హుజూరాబాద్లోని నాగార్జున డైరీలో బతుకమ్మ సంబురాలు అంబరాన్నంటాయి. చిత్తు చిత్తుల బొమ్మ …శివుని ముద్దుల గుమ్మ..బంగారు బొమ్మ దొరికెనమ్మో ఈ వాడలోన అంటూ లయ బద్దంగా పాడలు పాడుతూ….కోలాట నృత్యాలతో బతుకమ్మ వేడుకలు జరుపుకున్నారు. తెలంగాణ సంస్కృతి, సంప్రదాయాలకు ప్రతీక అయిన బతుకమ్మ పండుగను డైరీ యాజమాన్యం, ఉద్యోగులు అందరూ ఆనందంగా ఆడి పాడారు. డైరీ చైర్మన్ పుల్లూరి ప్రభాకర్ రావు సకుటుంబ సపరివార సమేతంగా ఈ ఉత్సవాలలో పాల్గొని ఆడిపాడారు. ఆయన బతుకమ్మ పాటలు పాడి, కోలాటం ఆడి వారిని ఉత్సాహపరిచారు.
బతుకమ్మ పండుగ ప్రాముఖ్యతను తెలియజేస్తూ డైరీ చైర్మన్ ప్రభాకర్ రావు మాట్లాడుతూ.. బతుకమ్మ పండుగకు వేల సంవత్సరాల చరిత్ర ఉందని తెలిపారు. పురాణాల్లోని ధర్మాంగదుని కథను వివరించి, లక్ష్మీదేవి అనుగ్రహంతో జన్మించిన ఆడపిల్లకు బతుకమ్మ అని పేరు పెట్టడం వెనుక ఉన్న చరిత్రను తెలియజేశారు. తెలంగాణ ఉద్యమంలో బతుకమ్మ ఆటపాటలు ఒక భాగమని, పోరాటాల్లో మహిళలను భాగస్వాములను చేసి, వీర తిలకం దిద్దిన గొప్ప చరిత్ర బతుకమ్మకు ఉందని అన్నారు. డైరక్టర్ పుల్లూరి గణేష్ మాట్లాడుతూ.. తెలంగాణ ఆడపడుచులు బతుకమ్మ ఆడితే ప్రకృతి పులకరిస్తుందనన్నారు. ప్రకృతితో ముడిపడిన పండుగ అని, పూలనే దేవుడిగా కొలవటం, తమ కష్టాలను పాటలుగా పాడుకోవడం తెలంగాణ ప్రజల ప్రత్యేకత అని వివరించారు. బతుకమ్మ పేర్చడంలో వాడే ఆకులు, పువ్వులు మంచి ఔషధ గుణాలు కలిగి ఉంటాయని, వాటిని చెరువులో కలపడం వల్ల నీరు శుద్ధి అవుతుందన్నారు. తర్వాత బతుకమ్మల చుట్టూరా అటపాటలతో నృత్యాలు చేస్తూ, సందడి చేశారు. ఈ వేడుక అందరినీ ఆకట్టుకుంది. ఈ కార్యక్రమంలో డైరీ యాజమాన్యం, సీఈఓ కృష్ణ ప్రసాద్, ఉద్యోగులు, రైతులు పాల్గొన్నారు.
