Avatar | హాలీవుడ్ విజువల్ మాస్టర్ జేమ్స్ కామెరూన్ తెరకెక్కిస్తున్న ప్రతిష్టాత్మక అవతార్ సిరీస్‌లో మూడో భాగం ‘అవతార్: ఫైర్ అండ్ యాష్’ ట్రైలర్ విడుదలైంది. ఈ ట్రైలర్‌ను జూలై 25న ‘ది ఫెంటాస్టిక్ ఫోర్: ఫస్ట్ స్టెప్స్’ సినిమాతో పాటు థియేటర్లలో ప్రదర్శించారు. అగ్ని మరియు బూడిద నేపథ్యంతో రూపొందిన ఈ ట్రైలర్ పండోరా ప్రపంచాన్ని మరోసారి ఊహాతీత దృశ్యాలతో పరిచయం చేస్తోంది.
విజువల్ ఎఫెక్ట్స్ పరంగా మరో అడుగు ముందుకు వేసిన ఈ చిత్రంపై ట్రైలర్‌తో అంచనాలు భారీగా పెరిగాయి. అవతార్ అధికారిక సోషల్ మీడియా పేజ్ ద్వారా ట్రైలర్‌ను షేర్ చేయగా, ఇది అభిమానుల్లో అమితమైన ఉత్కంఠను రేకెత్తించింది. ఫస్ట్ లుక్ పోస్టర్‌లో బ్రిటిష్ నటి ఊనా చాప్లిన్ పోషిస్తున్న ‘వరంగ్’ అనే పాత్రను పరిచయం చేశారు. ఈ పాత్ర నావి తెగలో కీలక భూమిక పోషించనుందని తెలుస్తోంది. ‘అవతార్: ఫైర్ అండ్ యాష్’ ప్రపంచవ్యాప్తంగా డిసెంబర్ 19న విడుదల కానుంది. ఈ చిత్రం తెలుగు సహా పలు భారతీయ భాషల్లో విడుదలవుతుండటంతో భారతీయ ప్రేక్షకుల్లోనూ ఆసక్తి భారీగా పెరిగింది.
