Kalpika | సినీ నటి కల్పిక గణేష్ మరోసారి వార్తల్లోకి ఎక్కారు. రంగారెడ్డి జిల్లా మొయినాబాద్‌లోని ఓ రిసార్ట్‌లో సిబ్బందిపై దురుసుగా ప్రవర్తించినట్టు ఆరోపణలు వచ్చాయి. సోమవారం మధ్యాహ్నం ఒంటరిగా అక్కడికి వెళ్లిన కల్పిక, రిసెప్షన్ వద్ద సిబ్బందిపై కోపంగా చిందారు. మెనూ కార్డు, రూమ్ తాళాలు మేనేజర్ ముఖంపై విసిరినట్టు ప్రత్యక్షసాక్షులు చెబుతున్నారు. సిగరెట్లు అడిగిన సమయంలో సిబ్బంది స్పందన లేదన్న కారణంతో దాదాపు 40 నిమిషాల పాటు హంగామా చేసినట్టు తెలుస్తోంది.
ఈ ఘటనపై కల్పిక స్పందిస్తూ, తాను ఎలాంటి తప్పు చేయలేదని, రిసార్ట్ సిబ్బంది అసహ్యంగా ప్రవర్తించడంతో నచ్చక బూతులు తిట్టాల్సి వచ్చిందని తెలిపారు. తనపై జరిగిందంతా వీడియో తీసి సోషల్ మీడియాలో షేర్ చేశారు. ‘‘ఒక కేసు విషయంలో మానసిక ఒత్తిడిలో ఉన్న నేను రిలాక్స్ అవ్వాలనే ఉద్దేశంతో రిసార్ట్‌కు వెళ్లాను. కానీ అక్కడ కూడా మనశ్శాంతి లేకపోయింది’’ అని ఆవేదన వ్యక్తం చేశారు.
ఇది కల్పికకు సంబంధించి తొలి వివాదం కాదు. గతంలో గచ్చిబౌలిలోని ప్రిజం పబ్‌లో పుట్టినరోజు వేడుకల సమయంలో సిబ్బందితో వాగ్వాదానికి దిగారు. డిజర్ట్ విషయంలో గొడవ పడుతూ లైవ్ వీడియో పెట్టి పబ్ సిబ్బందిపై ఆరోపణలు చేశారు. అయితే, పబ్ యాజమాన్యం మాత్రం ఆమెనే తప్పుబడుతూ, అసభ్యంగా ప్రవర్తించిందని, ప్లేట్లు విసిరేసిందని పోలీసులకు ఫిర్యాదు చేశారు. దీంతో గచ్చిబౌలి పోలీస్‌స్టేషన్‌లో కేసు నమోదైంది.
ఇటీవలి వరుస సంఘటనలతో కల్పిక ప్రవర్తనపై నెటిజన్లలో చర్చ మొదలైంది. ‘‘ఇది పబ్లిసిటీ కోసమా? లేక మానసిక ఒత్తిడిలో చేస్తున్న చర్యలేనా?’’ అంటూ విమర్శలు వ్యక్తమవుతున్నాయి.
